Här President,

Esou ewéi den Artikel 83 vum Chambersreglement et virgesäit, bieden ech Iech, dës parlamentaresch Fro un den Här Sportminister an un d’Madamm Minister fir Gesondheet weider ze leeden.

De Centre médico-sportif zu Jonglënster huet bis zur Covid-bedéngter Fermeture lescht Joer groussen Zoulaf kannt vu Sportler aus den Nopeschgemengen an aus dem Kanton Iechternach. Säit dëse regionale Centre médico-sportif seng Dieren ophat hunn notamment vill Leit aus der Regioun Mëllerdall net méi misse méi wäit bis an en anere Centre um fueren. Leider si bis elo d’Dieren vum Centre Jonglënster net méi opgaangen, obwuel aner Centren erëm operationell sinn.

An dësem Kontext géif ech gäre folgend Froen un d’Regierung stellen:

1. Deelt d’Regierung d’Meenung datt de Centre médico-sportif zu Jonglënster eng wichteg Ulafstell fir vill Sportler aus ganzer Ëmgéigend ass a verhënnert datt d’Leit vill Kilometeren an den Owesstonne mussen zréckleeën, zu engem Moment wou manner Busser fueren  ?
2. Ass geplangt datt de Centre médico-sportif zu Jonglënster rëm soll opgoen ?
3. Wa jo, wéini ?
4. Wann nee, aus wéi enge Grënn ?

Här President, ech bieden Iech mäin déifste Respekt unzehuelen.

Françoise Hetto-Gaasch

Deputéiert

Här President,

Esou ewéi den Artikel 84 vum Chambersreglement et virgesäit, bieden ech Iech, dës drénglech parlamentaresch Fro un den d’Madamm Minister fir Gesondheet weider ze leeden.

Mengen Informatiounen no kréie Patienten déi Covid positiv sinn an dann eng Invitatioun fir hir Covid-Impfung kréien, oft ënnerschiddlech Informatioune vun hiren Doktere wéi op der Santé-Hotline. Esou kënnt et wuel ëfters vir datt d’Patiente vun hirem Hausdokter gerode kréien si sollten sech réischt 3 Méint no der Infektioun impfe loossen, op der Hotline kréien se dann awer gesot si kéinte resp. missten sech direkt impfe loossen. Aner Doktere schwätze vu 6 Woche Waardezäit, nach anerer roden éier 6 Méint no enger Infektioun ze waarden.

Virun dësem Hannergrond wéilt ech der Madamm Gesondheetsminister folgend Froe stellen:

1. Huet de Ministère fir esou Fäll kloer Consignen un d’Generaliste rausgi resp. och un d’Leit déi op der Hotline de Patiente Ried an Äntwert stinn?
2. Wa jo, wéi sinn déi beschriwwe Fäll vu widderspréchlechen Informatiounen ze erklären?
3. Wien huet an esou engem Fall vun ënnerschiddleche Rotschléi fir d’Patienten dat leschte Wuert?
4. Deelt d’Madamm Minister d’Meenung datt et immens wichteg ass datt hei all déi implizéiert Acteuren déi selwecht Consignë kréien an dës och un d’Patiente weiderginn?

Här President, ech bieden Iech mäin déifste Respekt unzehuelen.

Françoise Hetto-Gaasch

Deputéiert

Här President,

Esou ewéi den Artikel 83 vum Chambersreglement et virgesäit, bieden ech Iech, dës parlamentaresch Fro un d’Madamm Minister fir Gesondheet an un d’Madamm Justizminister weider ze leeden.

Rezent goufen et eng Rei Covid-Infektiounen am Prisong zu Schraasseg an et goufen Informatiounen dozou datt eng grousse Majoritéit vun de Prisonéier refuséiert sech impfen ze loossen.

Aus dëse Grënn wollt ech folgend Froen un d’Regierung stellen:

1. Wéi eng Grënn gi fir en eventuelle Refus sech impfen ze loosse genannt?
2. Wéi gesäit dat sanitär Konzept am Prisong aus? Halen d’Prisonéier sech drun fir sech an déi aner ze schützen, wëssend datt d‘Personal virum Virus geschützt muss gi fir kënnen hir Missioun ze assuréieren?
3. Ass virgesinn och d’Personal aus dem Prisong ze impfen, fir souzesoen e Cordon sanitär ronderëm d’Prisonéier ze leeën?
4. Wéi ass d’Prozedur am Fall vu schwéiere Krankheetsverleef vu Prisonéier a wou a wéi gëtt eng evtl. Hospitalisatioun organiséiert an encadréiert?

Här President, ech bieden Iech mäin déifste Respekt unzehuelen.

Françoise Hetto-Gaasch

Deputéiert

Här President,

Esou ewéi den Artikel 83 vum Chambersreglement et virgesäit, bieden ech Iech, dës parlamentaresch Fro un d’Madamm Gesondheetsministesch weider ze leeden.

D’ médecins-vétérinaires sinn zanter Enn Mäerz 2020 obligatoresch en tant que professionnels de santé  Deel vun der réserve sanitaire, An deem Kontext sinn d’médecins-vétérinaires 2020 och an de centres avancés deployéiert ginn.

De médecins-vétérinaires gouf vun der Madamm Gesondheetsministesch, duerch een Breif vum 17. Dezember 2020 un den Collège Vétérinaire an un d’AMVL  matgedeelt datt se en tant que professionnels de santé och Deel vun der réserve sanitaire wieren, genausou wei dei aaner medizinesch Beruffer a professionnels de santé. Se géingen deemno och prioritär Accès zu den Impfungen kréien, genausou wei déi aner medezinesch Beruffer a professionnels de santé . Am Artikel 9 vum Règlement Grand-Ducal vum 15. Dezember 2020 ass och festgehalen datt

«En cas de circonstances exceptionnelles, telles que des épidémies, des faits de guerre ou des catastrophes, le ministre ayant la Santé dans ses attributions peut […] accorder l’autorisation temporaire d’exercer pendant une période ne pouvant excéder douze mois les activités de : 1°médecin ou certaines activités relevant de l’exercice de la médecine aux médecins-dentistes et aux médecins vétérinaires ».

Elo gouf de Vétérinairen awer den 5. Mäerz 2021, erëm duerch een Bréif vun der Madamm Gesondheetsministesch matgedeelt ,datt d’réserve sanitaire reorganiséiert gi wier an datt bis dato elo awer net virgesinn wier op d’médecins-vétérinaires zeréckzegräifen an datt dës och keen prioritären Accès zu der Impfung hätten.

D’médecins-vétérinaires wieren zwar nach ëmmer an der réserve sanitaire mee se wieren aus dem cordon sanitaire erausgeholl ginn.

An Däitschland, souwuel ewéi an Frankräich gehéieren d’Vétérinairen zu de Gruppen mat prioritärem Accès zur Impfung.

An dësem Kontext géif ech gäre folgend Froen un d’Regierung stellen:

• Aus wéi engem Grond sinn d’médecins-vétérinaires ausgeluede ginn ?
• Virum Hannergrond vun der aktueller sanitärer Kris, mengt d’Regierung net datt et evident ass vir d’réserve sanitaire, zu där d’médécins-vétérinaires gehéieren, zu all Moment asazbereet ze halen, an dës an deem Sënn prioritär ze impfen ?
• Wëssend datt d’médecins-vétérinaires, duerch hier berufflech Presenz op diversen Niveau’en – chaîne alimentaire, santé et bien-être animal, Epidemiesurveillance, santé publique, laboratoires, Plan National Antibiotiques-One Health- een intensiven, souwuel quantitativ wéi qualitativ, Kontakt zu villen, dachs vulnerabelen Leit hunn, wou d’Anhale vun de gestes barrières dachs net méiglech ass duerch d’Interventioun u sech, aus wéi engem Grond ginn si net méi zum cordon sanitaire gezielt ?
• Niewent de médecins-vétérinaires, wéi eng medezinesch Professiounen an professionnels de santé, sinn nach exclus vum cordon sanitaire, an domadder vun der prioritärer Impfung ?

Här President, ech bieden Iech mäin déifste Respekt unzehuelen.

Françoise Hetto-Gaasch

Deputéiert

Gemäß Artikel 83 der Geschäftsordnung der Abgeordnetenkammer bitten wir Sie, die parlamentarische Anfrage an den Herrn Minister für Immigration und Asyl weiterzuleiten.

In einem rezent erschienen Artikel von reporter.lu wurde die Umsetzung der Istanbuler Konvention im luxemburgischen Immigrations-und Asylrecht anaylisiert.

Durch die Ratifizierung der Istanbuler Konvention am 18. Juli 2018 wurde das Immigrationsgesetz durch einen zusätzlichen Absatz ergänzt, der ausschließlich die Situation von Opfern häuslicher Gewalt behandelt. Wenn die persönliche Situation, ihre Gesundheit, ihr mentaler Zustand, ihre Familiensituation oder auch die Bedrohung ihrer Sicherheit im Herkunftsland dies rechtfertigen, können Opfer eine Aufenthaltsgenehmigung „aus privaten Gründen“ anfragen und im besten Fall auch erhalten.

Vor diesem Hintergrund möchten wir folgende Fragen an den Herrn Minister stellen:

• Wie viele Anträge aufgrund von häuslicher Gewalt werden jährlich beim Ministerium gestellt?
• Wie viele solcher Anträge wurden in den letzten 3 Jahren genehmigt bzw. abgelehnt?
• Auf welche Kriterien basiert sich das Ministerium um seine Entscheidung zu fällen?
• Basiert sich das Ministerium auf eine wissenschaftlich basierte Risikoevaluation? Wenn ja welche?

Es zeichnen hochachtungsvoll,

Francoise Hetto                                            Paul Galles

Abgeordnete

är President,

Esou wéi den Artikel 83 vum Chambersreglement et virgesäit, biede mir Iech, dës parlamentaresch Fro un den Här Bauteminister an un den Här Finanzminister weiderzeleeden.

Eisen Informatiounen no gëtt et zu Colmer-Bierg Déngschtwunnengen vun der Police, déi zanter Joren eidel stinn. Wéinst der Penurie u sozialem Wunnraum am Beräich vum Logement locatif am Besonneschen an am Kontext vu Wunnraum am Besëtz vum Staat am Allgemengen géife mir gäre folgend Froen un déi zoustänneg Ministere fir ëffentlech Aarbechten respektiv Finanze stellen:

• Kann den Här Minister confirméieren, dass déi ugeschwaten Déngschtwunnengen zu Colmer-Bierg eidel stinn? A wa jo, zanter wéini an aus wéi engem Grond?
• Kann den Här Minister eis eng Lëscht vu weideren Déngschtwunnenge vun der Police uechter d’Land virleeën, déi och eidel stinn? Zanter wéini an aus wéi engem Grond?
• Gëtt et doriwwer eraus nach Haiser oder Wunnengen am Besëtz vum Staat, déi zanter längerer Zäit eidel stinn? Wa jo, wéi vill sinn et der a wou befanne sech dës Immobilien?
• De Staat ass och Propriétaire vum Café-Restaurant um Waldhaff. Wat soll mat deem Komplex geschéien? Wéini sollen d’Renovatiounsaarbechten ufänken? Ass de Staat gewëllt, dee ganze Komplex un eng Gemeng ze verkafen? Wann net, aus wéi engem Grond?

Här President, mir bieden Iech, eisen déifste Respekt unzehuelen.

Marc Lies                                            Françoise Hetto-Gaasch                     Paul Galles

Deputéierten                                      Deputéiert                                          Deputéierten

Här President,

Esou ewéi den Artikel 83 vum Chambersreglement et virgesäit, bieden ech Iech, dës parlamentaresch Fro un d’Madamm Gesondheetsministesch wéi och un den Här Sportsminister weider ze leeden.

Danzschoulen organiséieren momentan Danzkueren per Videokonferenz. D’Kapitel 2, Artikel 4bis. vum Projet de loi portant modification de la loi modifiée du 17 juillet 2020 sur les mesures de lutte contre la pandémie Covid-19 gesäit folgend Oplagen fir d’Sportsaktivitéiten fir :

« Un maximum de dix personnes peut se rassembler pour pratiquer simultanément une activité sportive ou de culture physique à condition de respecter, de manière permanente, une distanciation physique d’au moins deux mètres entre les différents acteurs sportifs.

Les installations sportives doivent disposer d’une superficie minimale de quinze mètres carrés pour les activités sportives exercées individuellement, d’au moins cinquante mètres carrés pour les activités exercées par deux personnes au maximum et d’au moins trente mètres carrés par personne pour les activités exercées par trois à dix personnes au maximum. »

An deem Kontext hat den Här Sportsminister am Februar 2021 an engem Communiqué informéiert datt d’Danzen oder all anere Sport Dobannen ausgeübt kann ginn, een eben just déi am Gesetz verankert Mesuren misst respektéieren. Et géif een awer recommandéieren keen Sport Dobannen ze maachen mee dësen no baussen ze verlageren, an dëst vir en ligne ze sinn mat de Mesuren déi an der Educatioun an an der Santé virgesi sinn.

Ausserdeem hätt de Conservatoire dierfen Danzkueren organiséieren, mat der Begrënnung datt dëst ënner „éducation physique“ géing falen, wärend d’Kueren an den Danzschoulen ënnert „culture physique“ géinge falen, obschonn dës Kueren an der Realitéit d’selwecht géingen oflafen.

An dësem Kontext géif ech gäre folgend Froen un d’Regierung stellen:

• Kann d’Regierung mech informéieren, ob d’Danzschoulen mussen zou hunn oder ob dës ënnert deenen am Gesetz virgesinnen Oplagen dierfen Presenzkueren organiséieren ?
• Gëllen d’Recommandatiounen vum Här Sportsminister, datt all Sportskueren dobaussen sollen oflafen, nach ëmmer ?
• Ass dat momentan och nach ëmmer esou datt en Ënnerscheed tëschent den Danzkueren am Conservatoire an deenen a de privaten Danzschoulen gemaach gëtt ?
• Wa jo, aus wéi engem Grond, wëssend datt déi privat Danzschoulen finanziell extrem leiden an datt se duerchaus capabel sinn d’Kueren ënnert deene selwechte Konditiounen ofzehalen, mam Respekt vu sämtleche Hygiensmesuren ?

Här President, ech bieden Iech mäin déifste Respekt unzehuelen.

Här President,

Esou ewéi den Artikel 84 vum Chambersreglement et virgesäit, bieden ech Iech, dës drénglech parlamentaresch Fro un d’Madamm Justizministesch, d’Madamm Familljeministesch an den Här Immigratiounsminister weiderzeleeden.

Den 23. Mäerz 2021 goung an engem RTL Reportage rieds vu Persounen, déi zanter Juni 2020 aus dem Prisong entlooss goufen, ouni dass si ee feste Wunnsëtz haten. Et heescht an deem Reportage weider, dass vun deenen 30 Persounen, sech der 11, illegal hei am Land opgehalen hunn an déi aner hätten d’Iwwernuechtungsofferen vum Service central d’assistance sociale respektiv dem Service psycho-éducatif vun der Prisongsverwaltung net acceptéiert.

D’Madamm Justizministesch huet erkläert, dass geplangt wier, de Schraasseger Ex-Detenuen d’Méiglechkeet ze ginn iwwergangsweis op Giwenech ze goen. Och géif um Projet vun de sougenannten Transitiounswunnengen geschafft ginn. An enger rezenter Äntwert op d’parlamentaresch Fro n°3698 hunn d’Madamm Ministeren nach geäntwert, dass, entgéint dem Koalitiounsaccord vun 2018, 2019 decidéiert gi wier zu Lëtzebuerg keng Transitiounshaiser ze schafen.

Mir wéilten duerfir folgend Froen u virgenannt Ministere stellen :

• Kënnen d’Ministeren eis soen, wéi vill Persounen, déi déi lescht Joren aus dem Prisong vu Schraasseg entlooss goufen, eng Iwwernuechtungsoffer gemaach kritt hunn?

• Wéi vill Persounen hunn dës Offeren refuséiert?
• Wat waren d’Grënn vun deenen Ofsoen (den Detenu hat schonn eng Méiglechkeet fir ze logéieren, etc.) ?
• Wier et méiglech dës Informatiounen opgelëscht op déi lescht 5 Joren ze kréien?

• Kënnen eis d’Ministeren erklären, ob dann elo Transitiounshaiser geplangt sinn oder net, wëssend dass ni gefuerdert gouf, dass sou Strukturen nëmmen Ex-Detenuen solle reservéiert bleiwen?

• Wéi gëtt am allgemengen de Suivi vun den Ex-Detenue gemaach? Wie mécht dee Suivi? Wéi leeft dee Suivi of?

• Kënnen d’Ministeren bestätegen, dass et an de leschte Joren just zu där enger, am Reportage beschriwwener, onvirbereeter Entloossung aus dem Prisong vu Schraasseg komm ass? Wéi konnt et dozou kommen?

• Wat déi 11 Persounen, déi illegal am Land waren, ubelaangt, kënnen d’Ministeren eis soen, ob et sech hei exklusiv ëm Persounen aus Drëttlänner handelt?

• Kënnene d’Ministeren eis erklären, wéi d’Prise en charge vun dëse Persounen konkret no hirer Entloossung ofleeft?

• Ginn dës Persounen, no hirer Entloossung, direkt am Centre de rétention ënnerbruecht, wou jo och en psychosozialen Encadrement séchergestallt ass, fir duerno ausgewisen / ausgeflunn ze ginn ?
  • Wann net, wéi gëtt hir Ausweisung konkret duerchgezunn?
  • Ginn et do Prozeduren? Wa jo, kënnen d’Ministeren, déi am Detail beschreiwen?

• Wann net, ginn déi Leit an deem Fall sech selwer iwwerlooss?
  • Sollt dat de Fall sinn, sinn d’Ministeren net der Meenung, dass de néidege Kader feelt fir ze verhënneren, dass se an de kriminelle Milieu nees erofrutschen? Hunn d’Ministeren dozou statistescht Material?
  • Sinn d’Ministeren der Meenung, dass Ännerungen un de gesetzleche / prozedurale Bestëmmungen néideg sinn?

Här President, mir bieden Iech, eisen déifste Respekt unzehuelen.